PEQUENA FANTASÍA SOBRE UN ALALÁ

O alalá é un canto a viva voz que non ten acompañamento. É, por dicilo doutra maneira, un “argotío” (aturuxo) de liberdade que sae do ser, da alma e está cheo de sentimento. Xeralmente é un canto tristeiro, polo que con frecuencia se atopa nun ton menor, como é o caso deste que vos presento. O Alalá non está sometido a unha métrica determinada. Poderiamos dicir que o cantor o interpreta sempre dunha maneira libre: Ad libitum.
Pois ben, a cantiga que musiquei para guitarra baixo o título de pequena fantasía é un alalá que ten o seu propio texto que, polo que parece, pertence ás terras do Támega, ou sexa, Verín.



Como outras partituras anteriores prepareina coa intención de aportar material tradicional para a música de guitarra. Aínda que, para iso, sometina a unha métrica e engadinlle algunhas achegas que, baixo o meu criterio, enriquecen a música inicial que, por ser tradicional pertence ao acervo cultural galego.